Ko ngā māharahara o te iwi Māori mō te whakamahi tonu i te pūngao puia
Mai i te whakatautanga i Te Tiriti o Waitangi, ka utaina e te kāwanatanga matua a tauiwi ōna tikanga takitahi ki runga i te whenua mā te hanga ture, hei tukituki i te rangatiratanga me te kaitiakitanga ā-iwi, ā-hapū a te Māori i ōna whenua, i ōna ngāwhā tipua. I roto i ngā kōrero e whai ake nei, ka tirohia te ngaro haeretanga o te whakahaeretanga o te rawa pūngao puia e ngā iwi Māori me te tautuhi i ētahi o ngā nekeneketanga kia hoki mai ai te mana me te rangatiratanga ki aua iwi Māori anō.
I ngā rā o mua kāore te Pākehā i te tino mārama ko te Māori i whai mana ā-iwi, ā-hapū ki te whakahaere ā-rōpū, whakahaere ā-Māori i ō rātou whenua me ngā rawa wai. Ko te tikanga o te noho o te katoa o te whenua ki raro i te whakahaere ā-iwi, kāre rawa atu i pai ki te tirohanga Pākehā. He taonga ngā rawa ngāwhā ki ngā iwi nā rātou aua ngāwhā. Nā ngā ture o te kawanatanga i whakahoro haere tēnei rangatiratanga Māori. I taikaha ētahi o ngā iwi me ngā hapū ki te whakahē i ngā ture kāwanatanga me te tuku kerēme ki Te Rōpū Whakamana i te Tiriti o Waitangi. Na, ka kitea kua huri te Māori ki te whakatika i te ngaronga o ō rātou taonga me te whakapuaki anō i ō rātou rangatiratanga me te mana kaitiaki o ngā taonga nei.
I raro i te tikanga mana Māori o mua, ko te pupuri i ēnei rawa Māori hei taonga ohanga kāore i tiro korotahangia, heoi anō ko te mea nui he mea whanake tēnei hei whakatutuki i ngā hiahia kia whai hua anō ai ki te Māori ngā rawa nei i raro i te mātāpono o te kaitiakitanga. Kei konei tonu tēnei mātāpono Māori, ko te mana ka noho mai ki raro i ngā kaitiaki Māori.
Ko te urutanga mai o te pūngao puia hei whakakaha i te hanga hiko, mai i te tau 1958, kāore i whai hua ki ngā iwi o Te Arawa me Ngāti Tūwharetoa. Ko te whakatūtanga i tēnei rawa me te kore whai whakaaro atu ki ngā iwi me ngā motika hapū i raro i te rangatiratanga o Te Tiriti o Waitangi, i noho hei take whakamāharahara i te Māori, ā, kāore anō kia tino whakaututia mai e te kāwanatanga. Kei te taupatupatu tonutia e tauiwi mā.
Hei mahi
He aha ōu ake whakaaro mō tēnei kaupapa?