Ngā rua
Ko ngā rua kai te āhuatanga matua o te tohu kai. He rua tō ia whānau, he wāhanga rānei o tētahi rua rahi tonu.
Ko te nuinga i whakamahi i ēnei hei whakaputu i ngā huawhenua pēnei i te kūmara, te taro, te parareka, me te taewa. I te nuinga o ngā wā, ka whakaputua wehewehea te kūmara, te rīwai, me te taro, kia kaua ngā pua atua o tētahi e whakapirau i tētahi atu. I whakaputua te kūmara ki te rua motuhake i ngā wā katoa, heoi anō, tērā e whakaputua tahingia ngā taro me ngā rīwai i te rua kotahi ina i roto tēnā me tēnā i tōna ake paepae tōtara.
Kua kite i rō tuhinga he kōrero mō ngā huarākau o ia wā i whakaputua ki te rua, engari ko ngā hua mārō, pēnei i te maringi me tōna kiri mātotoru. Ko ngā hua ngohengohe i wawe te kainga, kāore i tohua mō raurangi.
He rua anō mō te whakaputu wai.
I karia he ara mō ngā wai marangai kia pai ai te whakaputu, ā, i pērātia anō mō ētahi puna wai. Ko ngā rua i waihangangia mai e ngā tohunga, ehara mā te kūare tērā mahi. I āta whiriwhiritia ki hea ngā rua tū ai. Ko te wāhi maroke me ngā oneone kāore e pupuri i te wai ngā wāhi pai mō ēnei, pērā i tētahi parehua, te parenga teitei i runga ake o tētahi tuakahiwi rānei, ā, mēnā ka taea, ki runga i tētahi puia moe – koinei te wāhi i mīharotia mō te noho o te rua.
Ko ētahi rua i noho tata ki te wāhi māra, ki roto rānei i ngā wāhi papare o te pā. Ko ētahi rua ka āhua mamao tonu atu. Mehemea i te whakaekea te pā, ko ngā rua i mamao atu, i noho hei oranga ki te whakatahi rātou, ki te panaia rānei i ngā wāhi papare.
Ko te rua i karia ki te harapaki, ki tētahi wāhi wātea rānei. Kotahi mita ki te 2.5 mita te hōhonu o ngā rua, kei te āhua tonu o te wāhi me ngā momo kai i whakaputua. He rerekē ngā rawa i whakamahia e tēnā, e tēnā iwi hei uhi i te taha roto o ō rātou rua. I ētahi wā, i uhia ki te rauaruhe i karia mō te aruhe e tipu ana i raro.
Ko ētahi i whai raumanga i hangaia mai i te rākau mārō. Ko ētahi atu rua i hōrapatia ki te toka pakupaku me te pōhatu iti, ā, ka ruia ki te whakapaparanga kirikiri kia pai ai te heke atu o te wai ki raro iho, ngaro tonu atu. Ko ngā mea i ngā wāhi puia whai i pūmai ai te pāmahana, ka waiho kia wātea. Ko ērā i nui ai te wai i te oneone i te uku rānei a roto, i whai papa pērā i ngā mea kua kōrerotia i runga ake nei.
E ai ki ngā tuhinga ko te hanga o ngā rua he tapawhā-rite, tapawhā-hāngai, porowhita, porowhita-haurua anō hoki.
Ko te āhua o te tomokanga i hangaia ki te tikanga o te rua. Ko te rua hei whakaputu wai i hunaia ki te rau tipu, ā, i taea atu mā tētahi ara heke i tapahia i tana taha, mā te arawhata rānei i mahia mai i tētahi poro rākau he mea tapahi ngā takahanga mā te waewae. Ko te rua hei whakaputu kai ka whai puare kua uhia hei whakaiti ake i te kaha o te mārama, o te haukū tērā e kino ai ngā huanga kai.
I ētahi wā, ko ngā taha pakitara i uhia ki te rauwhare i rarangatia hei ārahi i te wai kia rere i waenganui i te rauwhare me te taha. Ka rere atu i reira ki rō waikari i ngā taha, ki rō puare i karia ki te oneone, he mea whakakī ki te pōhatu, hei āki i te wai kia puta atu.
Te tuanui me te tatau
Ko te hanga i te tuanui he mahi whai tikanga tonu. I waihangangia ōna anō paparanga kia noho haukū kore me te aukati i te hau takiwā kia kaua e uru ki te rua, hei whakaiti ake i te whakakino i ngā kai o roto. I whakamau atu te tāhuhu, engari karekau he kaho. He papa taikākā mātotoru kē ka herea atu ki mua, ki muri o te anga o te tuanui whakaheke. Ka tāpiria atu he paparanga mātotoru anō, he rau aruhe, he rau whekī rānei, kātahi ka uhia atu he whakapaparanga oneone hei ārai i te haukū me te hau. I heke atu te tuanui mai i muri ki mua hei kawe i te wai me te haukū ki waho.
Ko ētahi rua i whai tatau i mua i purua ki te poharu hei whakakopi i te rua. Ko ētahi i whai taupoki i runga, i hangaia he anga tapawhā ki reira kia mōhiotia ai kei hea te puare o te rua, kātahi ka whakakopia hei ārai i te uru o te tōtā me te hau. Ko ētahi iwi i whakamahi i te ranunga kirikiri āhua rite ki te raima panakeke, engari kāre i pērā i te raima te mārō ka totoka ana.
Hei mahi
Hangaia mai he hoahoa o ngā tukanga hangarua i ngā wā o mua.